Pri Rotorua
Rotorua estas preferata ferialoko por multaj Nov-Zelandanoj kaj eksterlandanoj pro la maoria kulturo, bela pejzaĝo, naĝejoj de varma akvo, kaj vizitindaj lokoj por turistoj kaj sportuloj. Rotorua situas sudoriente de Auckland je proksimume tri horoj en aŭtomobilo. Ekde Wellington estas kvin horoj norden en aŭtomobilo. Por eksterlandanoj, estas pli facile flugi al Auckland kaj iri en aŭtomobilo aŭ aŭtobuso al Rotorua. Tamen, estas ankaŭ rektaj flugoj el Sydney per Air New Zealand, kaj ankaŭ el diversaj novzelandaj urboj.
Pri La NZEA Kongreso
Kiel kutime, la kongreso de NZEA estos interesa afero kun riĉa programo. Ni baldaŭ povos konfirmi ĉeeston de bone konata Esperantisto el eksterlando kiun NZEA invitos al la kongreso por prelegi, instrui, kaj gvidi sesiojn – por doni internacian etoson kaj por paroligi nin ne en angla sed en Esperanto. Ni ankaŭ ekskursos – eble al geoterma loko kun gejseroj, bolanta koto, kaj enterigita maoria vilaĝo, aŭ al agrikultura centro kie vi lernos multon pri ŝafoj kaj ŝafhundoj.
La kongreso okazos en nova kongresejo en la urbcentro. Kongresanoj devos mendi propran loĝejon. Tamen, Rotorua havas amason da loĝeblecoj ekde gastejoj por junuloj/studentoj ĝis luksaj kvin-stelaj hoteloj. Prezoj estas ne tre altaj. Hoteloj kaj restoracioj troviĝas sur la ĉefa strato laŭ kiu estas tre plaĉe promeni en vespera varmeto.